ايه المدة الي يمكن تجعلني ممتاز في اللغة و مفروض اقرا اد ايه يوميا و اشاهد التلفيون لمدة اد ايه علشان اوصل لده ؟

فيه قانون ف الفيزياء بيقول:

المسافة = السرعة X الزمن

يعنى لو عايز أروح اسكندرية (200كم) وماشى بسرعه 100 حاوصل ف ساعتين

ولو ماشى بسرعة 50 حاوصل فى 4 ساعات (50 كيلو ف الساعه x أربع ساعات )

زى ما المسافة بين القاهرة واسكندريه ثابته كمان مقدار المعلومات اللى محتاجها (مفردات وقواعد) عشان توصلنى لمستوى رائع ف أى لغه ثابت لإنى لازم يكون عندى كم معين من المفردات لا أقل عنه وكمان فهم واستخدام سليم للجرامر لا أقل عنه وده ثابت وبيتوقف برضه على عاملين زى السرعه والزمن كده:

قانون التقدم فى اللغات:

مستواى فى اللغه = مجهودى x الوقت المكرس للغه

يعنى لو باذاكر جامد لمده ساعتين يومياً حاحتاج ضعف الوقت اللى أنا محتاجه فى حالة ما إذا كنت باذاكر جامد (بتركيز) بس لمده ساعه واحده بس يومياً

أما لو كنت باذاكر جامد (بتركيز) لمدة 4 ساعات يومياً فحاختصر نص وقت الحالة الأولانيه

ولو باذاكر نص نص فى نفس الوقت حاطول علا نفسى

ولو باقعد وئت كتير اسمع واذاكر بس من غير تركيز وبادَّلَّع يبئه محتاج أضعاف أضعاف الوئت.

الطبيعى ف أى لغه عاديه (مش يابانى مثلا) إن اللغه تاخد حوالى سنتين (ع الأقل سنه ونُص) لو بادى م الصفر وباذاكر جد وبطريقه صح (حوالى 4 ساعات يوميا بتركيز) وبذاكر لوحدى لإن اللغه بطبيعتها مشوارها طويل ولا يمكن إختصار أشياء أساسيه فيها

الكلام ده مفروض يحفزنى ويشجعنى أشتغل مش يحبطنى وييأسنى

لإنه مهم أكون صادق معاك وأئول لك إن مشوار اللغه لا يمكن إنجازه فى شهر أو شهرين لكن مهم كمان إن تكون عندى عزيمة وإرادة نجاح وتصميم على المضى قدماً فلا أستسلم لأى إحباط أو مشاعر سلبية توهمنى بإن الموضوع صعب ومالوش لازمه

أى حد عادى طبيعى يئدر تماماً يجيب أى لغه بشرط يطبق القانون السابق بتاعها (يدى وقت ومجهود)

والحقيقة مستحيل التقدم الحقيقى فى أى لغه بدون وقت ومجهود

العنصرين اللى فاتوا (الوقت والمجهود) بيحركهم عنصر تالت هوه الأكثر أهميه وهوه الإرادة أو العزيمة أو التصميم

لإنى بالإرادة باشحن بطارية العزيمه اللى بتخلينى لا أيأس وأدى وقت ومجهود

فيه مثل فرنساوى بيئول:

vouloir c'est pouvoir

حرفياً: "الإرادة هى الإستطاعه" ومعناها اللى حاعوزه حاجيبه (روح التحدى والتصميم)

وبالإنجليزى ممكن نقول:

Will will win

يعنى الإرادة ستنتصر (لإن Will معناها كمان إراده ف الإنجليزى)

ربنا معاك ويوفقك وأهلا بأى سؤال.